【Emily】樂施毅行者40周年 推40公里限定版賽事
[2024.05.25] 發表
【明報專訊】樂施毅行者被政府列入下半年香港盛事年表，咁啱今年係毅行者喺香港舉行40周年，Emily得悉樂施會今年搞搞新意思，推出40公里限定版賽事。有體育界朋友話畀Emily知，呢個項目有可能只限今年舉行，想參加嘅人就要把握機會喇。
毅行者一向只有一項賽事，就係行100公里，由西貢北潭涌行到屯門哈羅香港國際學校，要48小時內走完，公開畀巿民報名參加；另一個係只行10公里，叫領袖行，係畀受邀者參與。今年樂施毅行者喺11月15至16日(周五至周六)舉行，新增嘅40公里組別起點同傳統100公里同樣係西貢北潭涌，但終點就喺飛鵝山基維爾營，要喺20個鐘頭內一次過完成。樂施會已開放報名，下月23日截止。
樂施毅行者(舊稱「毅行者」)原本係駐港啹喀兵嘅訓練活動，首屆喺1981年舉行，1986年樂施會應邀合辦，仲首次公開畀市民參加。1997年啹喀兵撤離香港，活動就由樂施會接手主辦。今年樂施會因應40周年，會搵番過去40年參加過毅行者賽事嘅人，喺11月齊齊到場參加今年嘅毅行盛事，部分就會以義工身分參與。
更多港聞
相關新聞
