【Emily】周守仁拍DSE打氣動畫 教家長製水果茶減壓

【明報專訊】文憑試(DSE)筆試下星期開考，天主教香港教區主教周守仁樞機聲演咗一段動畫短片(圖)，鼓勵應屆考生同家長。片中動畫版嘅周守仁提到，同學面對不小壓力，作為父母要同仔女同行，「與其自己扮唔緊張，不如做杯水果茶減壓」，仲話無論係製作或飲茶嘅時間都好減壓。

影片以菠蘿、蘋果同紅茶教大家製作水果茶，仲有DSE前考生家長「鍾依詩」介紹有咩好處，其中紅茶中嘅胺基酸有幫助調節壓力同睡眠嘅作用，菠蘿同蘋果就有豐富維他命，可以增強抵抗力。

周守仁話，父母同子女一齊飲水果茶，減壓之餘，最重要可以建立良好溝通。至於DSE考生，周守仁就勉勵話考DSE係走唔甩嘅，但考試真係唔代表一切，最重要係知道自己人生嘅理想同才華，而DSE只係畀空間同機會學生發展才華、實現理想嘅一個過程。