【Emily】參觀北極紫荊站 馬逢國唔使厚褸
[2023.08.30] 發表
【明報專訊】立法會議員喺暑假休會期間外訪似乎成為「指定動作」，選委界別嘅馬逢國最近就去咗北極，同家人到咗挪威斯瓦爾巴群島嘅朗伊爾城(Longyearbyen)，呢個係世界上有人常居嘅最北城市，人口約二三千。馬逢國話今次係香港極地研究中心創辦人何建宗協助安排，參觀對方自費喺北極圈設立嘅香港首個極地科研站「紫荊站」，了解佢哋嘅研究工作。
馬逢國話北極圈近年受全球暖化影響，斯瓦爾巴群島周邊嘅冰蓋明顯變薄，浮冰大減，裸露嘅岩層愈嚟愈多，成為科學家擔憂同研究嘅方向。
睇馬逢國上載社交平台嘅相，佢同太太去到北極都只係著薄羽絨，當日溫度介乎5℃至8℃，但原來試過夏天都有20℃以上，可見全球暖化幾咁令人擔心。
更多港聞
【Emily】中學生創作廣告貼城巴 推廣健康生活
【明報專訊】都市人生活繁忙，容易忽略健康。浸會大學早前舉辦全港首個大型中學生跨學科比賽，邀請中學生創作巴士廣告，推廣健康生活，共有來自28間... 詳情
相關新聞
