【Emily】酒店房「水舞間」 利景道歉
[2023.01.27] 發表
【明報專訊】有韓國遊客日前入住灣仔利景酒店，間房天花突然嚴重漏水，佢拍片放上Twitter。條片見到天花係咁漏水，地板水浸，牀鋪濕埋，拖鞋都浸到浮起，帖文寫住「Hong Kong never disappoints(香港從不令人失望)」，要夤夜搬去另一間酒店。事主仲話酒店職員畀咗把遮佢入去拎番個人物品，話可能要幾個月先賠償到，仲一度話唔會退房租，因已畀咗錢。
噚日事主喺Twitter更新，話酒店退咗房租畀佢，仲會短期內賠償損壞嘅嘢。佢話酒店解釋係房間正上方爆水管搞到漏水，又話好開心可以喺離港前解決件事。
灣仔利景酒店噚日喺facebook發聲明話，因「緊急事故」先會發生天花漏水，對受影響嘅客人道歉，即時作出相關安排同協助。
更多港聞
相關新聞
