【Emily】紅花嶺擬劃郊園 何君堯倡拓民宿 高球車送老弱登山
【明報專訊】政府之前提出要將沙頭角紅花嶺劃為郊野公園,一班立法會議員噚日喺環境事務委員會會議上提出唔少主意,其中選委會界別何君堯話,𠵱家喺紅花嶺睇唔到「Theme Park(主題公園)」,建議喺郊野公園增設車道,畀電動車同救護車等可以駛入,仲提議增設高爾夫球車,運送老弱人士上山。
何君堯仲建議喺郊野公園開拓民宿,例如設迷你酒店、汽車旅館等,等行山者中途可以休息。工程界議員盧偉國就以港人好鍾意嘅日本北海道自駕遊為例,話當地有好多國家級森林公園同埋濕地,例如「釧路濕原」,入面有公路、瞭望台、獨木舟等,可以帶來旅遊收入,又或有科研重點。佢仲話,如果郊野公園冇保育政策,就會被大自然「劣化」。
政府:改善紅花嶺山徑 盼設博物館
聽完多個議員嘅意見,政府回應時就話,近年社會上有聲音希望可以改善郊野公園設施,但同時亦有聲音話唔應該有咁多設施破壞大自然,所以設新設施時應要因地制宜,嚟緊會改善紅花嶺郊野公園嘅行山徑,亦會希望喺附近設開放式博物館。