【Emily】中環街市微縮展尋今昔香港
【明報專訊】市建局同華懋集團噚日起至7月16日,喺中環街市合辦《細塑今昔?智建未來》微型藝術展,慶祝香港回歸25年,共展出百件微縮作品,展示香港社區面貌同景點。特首林鄭月娥(左圖)噚日出席開幕禮時,重提自己當年為保育中環街市流咗好多汗同淚水,因為當時面對好大反對聲音,但今日就見證街市短短9個月已歡迎咗800萬人次遊客或市民。
林鄭:微型特別好看
放大通常很「醜陋」
林太又不點名提到候任特首李家超嘅施政方向「以結果為目標」,回想自己當日目標就係令中環街市成為遊人如鯽嘅地方,特別係畀中環白領有好去處。佢仲帶咗份禮物送畀中環街市,話噚日係佢任期最後一個月嘅第一日,開始收拾東西,「但這些不是垃圾,而是非常精彩的微型」——佢將自己做發展局長期間,一批一批以微型磁石所做嘅歷史建築,送畀華懋集團執行董事及行政總裁蔡宏興,請佢可搵地方展示,仲話「因為微型的東西特別好看,放大了的通常都很『醜陋』」。右圖為觀塘裕民坊微縮作品。
(戎麗嘉、楊柏賢攝)