【Emily】黃俊碩「放疫監」 顏汶羽抗疫瞓書房
【明報專訊】新冠病毒檢測早前呈陽性嘅民建聯會計界立法會議員黃俊碩喺facebook話,噚日係遞交核酸檢測樣本翌日起計嘅第14天,佢做快速測試呈陰性,可以出關喇。佢喺2月12日出現病徵及快速測試呈初步陽性後已經隔離,噚日係第16日。
隔離16日 黃:強大心理勝病魔
黃俊碩回顧抗疫歷程,感謝朋友關心,佢話當初發現染疫時感到震驚,之後心情平復,認為要有強大心理先可以戰勝病魔。其間佢有服用成藥減輕病徵,亦有監察基本生命徵象,即使身體情况變差亦未有太擔憂。黃俊碩又話,最近多咗朋友「中招」,向佢查詢染疫同隔離嘅注意事項。
另外,民建聯立法會議員顏汶羽最近每日喺各屋邨屋苑前線支援街坊,為咗保護自己同家人,佢一星期前開始盡量與同住家人分隔,包括改喺書房地下瞓覺,分開食飯,每日做快速測試。顏汶羽話同家人只能以視像方式見面,好驚去年剛剛出世嘅仔仔會忘記咗佢個樣,但每次聽到仔仔一門之隔嘅笑聲喊聲,都會暖在心頭。