【Emily】陳穎欣倡消費券強檢掛鈎 陳茂波說不
【明報專訊】財政司長陳茂波噚日出席立法會財務委員會,向議員簡報財政預算案。工聯會議員陳穎欣(圖)會上提出,將1萬元消費券同3月做嘅全民強制檢測掛鈎,接受3次檢測嘅市民先可領取,「唔配合做全民強檢、唔履行公民責任,就冇得受惠,冇得獎勵」。陳穎欣又形容,此舉可確保唔喺香港嘅市民無法領取,令企圖移民嘅「小黃人」不能受惠,為庫房節省開支。
不過,陳茂波就拒絕咗陳議員嘅建議,「喺呢個階段就唔好啦」,認為唔值得將兩者掛鈎。佢話如果市民唔接受強制檢測,已經有罰則處理,加上現時計劃4月派發首輪消費券,若要將兩者掛鈎,系統上要再處理。
喺會上,新民黨議員李梓敬關注近期移民嘅市民,指唔應該有資格領消費券,「點解離棄香港、離棄國家嘅人,我哋畀消費券佢?」不過選委會界別議員林智遠發言時就話,消費券一定要喺本地消費,相信已無漏洞,「我都想其他議員大方啲,既然我哋畀得出嚟,不如畀機會佢哋返香港嘅時候用啦」。