【Emily】極危犁頭龜移居英國

呢隻屬極度瀕危物種嘅犁頭龜（圖），由嘉道理農場暨植物園接收嗰陣已失去左前腿，亦沒有左後腿嘅爪，園方為佢安裝咗3個支撐滾輪喺龜甲下方，以助平衡同行走。（嘉道理農場暨植物園提供）

【明報專訊】犁頭龜係極度瀕危物種，根據有關瀕危龜嘅研究報告，全球野外可能只剩低少於100隻。嘉道理農場暨植物園(下稱嘉道理)有一隻犁頭龜，係香港海關喺香港國際機場充公得來，當時一共有57隻不同品種陸龜，2019年轉送到嘉道理野生動物拯救中心作短期照顧。嘉道理喺今個月將呢隻犁頭龜送到英國切斯特動物園，參加歐洲重要嘅物種保育計劃，希望未來佢可以繁殖出下一代，以幫助喺野外飽受嚴峻威脅嘅犁頭龜，最終提高野生族群嘅數字。

根據園方喺facebook提供嘅資料，呢隻犁頭龜估計係雌性，園方喺2019年接收佢時，佢已失去左前腿，亦冇左後腿嘅爪，可能係因為佢細個時有先天缺陷或曾經受傷。園方為佢安裝咗3個支撐滾輪喺龜甲下方，以助平衡同行走。園方將呢隻犁頭龜送去英國前，將佢小心地放入布袋，再放入特製嘅木箱中，確保佢喺長途旅程安全。