【Emily】自家爆谷贈財爺 羅庭德籲助青年創業

北區區議會主席羅庭德（右）噚日向財政司長陳茂波（左）送上佢親手研製同生產嘅爆谷、區議會撥款出版嘅《活用北區閒置官地》報告等，希望財爺同團隊研究吓點利用北區土地幫年輕人創業發展。（羅庭德fb圖片）

【明報專訊】財爺陳茂波近排開始會見唔同團體聽吓大家對下年《財政預算案》嘅意見，北區區議會主席羅庭德噚日出席其中一場，會後佢喺facebook上載同財爺嘅合照，話送咗一桶親手研製嘅爆谷等畀財爺。點解係送爆谷呢？佢發言時解釋係同北區發展有關。

羅庭德認為政府應該調撥資源創造創業土釀，畀年輕人有投身實業嘅機會。佢以自己研發爆谷嘅生意為例，話受各項限制，每月只可生產500至1000桶，喺現行嘅產業資助計劃下，無一個幫到產品產業化。佢引述噚日送畀財爺嘅《活用北區閒置官地》報告，話𠵱家北區有163塊閒置官地，仲有上水「水貨街」空舖等，認為係年輕人嘅發展空間，希望財爺研究吓。

佢又送咗另一份有關實習生計劃嘅總結報告畀財爺，話計劃係透過招募香港製造嘅工場、農場、木廠、魚排做合作伙伴，每期為幾十個年輕人提供有薪實習，希望有更多人可以為年輕人謀出路。