【Emily】考牌復故業 落選電工：選舉翌日上堂 會計妹fb改名「文在野」續監察政府

刁勝洪參選完立法會，即刻去進修建造業議會嘅安全課程，話完成課程後取得吊運牌，將會重投工作。（刁勝洪facebook圖片）

【明報專訊】立法會選舉落幕，落選者有唔同計劃，有份令到選委會界別「五光十色」嘅電工刁勝洪話自己收拾心情，重新投入工作，早前仲報讀咗行業嘅安全訓練課程(A12S)，話咁啱選舉日翌日就上堂，仲喺噚日完成3日課程，攞到吊運牌照。刁勝洪話選舉歷練令佢獲益良多，終身受用，感謝各界關懷同支持。

會計界今次有4人參選，綽號「會計妹」嘅潘文思怡輸咗，但話繼續發揮監察政府議會角色，並將選舉facebook專頁改名「文在野」，希望呢個平台能夠成為會計界及其他專業嘅溝通基地，將在朝、在野嘅人才連結，為香港社會共謀獻策。

喺九西選區落敗嘅馮檢基就話，喺咁嘅社會氣氛下，有15,961個選民投票畀佢，「你的每一票，都有非一般的意義」，同時感謝朋友面對壓力仍然堅持企出嚟幫佢。