【Emily】WhatsApp呃錢騙徒 最新扮鄺葆賢
[2020.12.25] 發表
【明報專訊】Emily噚日提過，有人喺WhatsApp冒認羅健熙、蕭亮聲兩個區議會主席，原來騙徒冒認嘅唔止兩個主席，葵青區議員梁志成亦話收到當區區議會主席「單仲偕」叫佢「聽日十點半到我寫字樓」。梁議員好有耐性咁同「單仲偕」對答，發現騙徒係想呃錢，要成6萬人仔。騙徒發現唔對路就刪除咗單仲偕嘅相，噚日下午Emily發現同一號碼已換成九龍城區議會副主席鄺葆賢嘅相，唔知係咪想繼續呃人喇。
叫入錢去親戚「王菊」內地戶口
梁志成喺facebook上載同騙徒嘅對話，騙徒叫梁志成上佢寫字樓，翌日就話自己行唔開，叫佢幫幫手，聲稱有親戚喺大陸要做手術要6萬人民幣。梁志成話自己只得3萬幾人民幣，騙徒話手術太急，叫佢去找換店匯3萬元畀親戚。梁志成話佢唔識去找換店匯錢，騙徒轉而叫佢入錢去其親戚「王菊」個內地銀行戶口，仲吩咐梁志成「抓緊D時間」。
梁志成喺fb大鬧電話行騙無日無之，呼籲大家唔好中伏。鄺葆賢亦喺fb話有人冒認佢，騙徒又係叫人「聽日上晝十點半到我office」，鄺葆賢話「扮咩啫 #劈頭一句叫人聽朝到__咁無禮貌嘅」。
更多港聞
【Emily】林鄭聖誕卡寄議員 藏香港十大標記
【明報專訊】特首林鄭月娥寄聖誕卡畀立法會議員，祝議員聖誕快樂、新年進步，卡上印有香港十大著名標記，問大家搵唔搵到。收到聖誕卡嘅民建聯劉國勳喺... 詳情
相關新聞
