【Emily】「抹黑不實 永遠見唔到讚政府嘅」 建制話泛民區議員橫額「播毒」
[2020.11.09] 發表
【明報專訊】區議員可以喺區內懸掛橫額宣傳措施、表達政見等，建制派區議員噚日開記者會，指控民主派區議員喺地區懸掛「抹黑、不實、散播仇恨」等橫額，其中被指有問題嘅橫額包括「反對大灣區種票，還我公平選舉」、「議會戰線，留一線光，面對極權，無畏無懼，無怨無悔」等，建制派認為涉及抹黑特區及中央政府，建議政府統一審批橫額嘅準則。
民建聯深水埗區議員劉佩玉、工聯會荃灣區議員葛兆源噚日開記者會，劉佩玉話喺10月至11月3日動員義工做「攬炒派『播毒』橫額大搜查」行動，統計到有84條橫額涉「播毒」，例如佢哋認為「國安法殺到！香港人迎戰！奪回香港」係仇恨言論，又認為宣傳流感疫苗注射活動係涉及商業宣傳或收費服務。
話推廣打流感針涉商業宣傳
葛兆源話，明顯見到民主派區議員散播抹黑內容，影響特區、中央政府，佢話好多政府部門做得唔錯，但永遠見唔到區議會讚政府部門嘅橫額，反而繼續抹黑、話政府做唔到嘢。
劉佩玉話，現時房屋署管理範圍懸掛嘅橫額、宣傳板要送審，包括內容要係資訊性，提供福利、服務為原則，但質疑地政總署冇送審機制，令橫額出現好多抹黑、不實內容，建議由政務司長統籌各相關部門，訂立統一審批準則。
更多港聞
【Emily】限聚下從簡 和平紀念日儀式 區議員：花圈有段古
【明報專訊】每年11月第二個星期日係本港嘅「和平紀念日」，噚日中環皇后像廣場和平紀念碑有獻花圈同默哀儀式，悼念二戰死難者，多名區議員都有出席... 詳情
【Emily】民政處唔派 區議員三無大廈裝洗手液
【明報專訊】新冠病毒疫情年初爆發後，多個區議會都有撥款購買防疫物資，希望幫到當區居民。中西區區議員彭家浩（Jordan）前日喺faceboo... 詳情
相關新聞
