【Emily】7?1立會被毁 復修更換費4000萬
【明報專訊】立法會經常舉辦導賞團,去年7月1日被闖入後,導賞團服務一直暫停。立法會秘書長陳維安回覆議員提問時透露,去年6月以來,喺保安事件中損毁或遺失物品嘅復修、更換費用合共3897.8萬元,當中最大筆開支用於建築面料,涉2007.8萬元,呢部分會由建築署承擔;其間秘書處聘請臨時保安服務以輔助保安執行職務,涉及開支約212.6萬元。
陳維安:政府負責2000萬
建築署稱1530萬
反修例風波中唔少政府物業同設施被破壞,建築署署長林余家慧回覆議員提問時稱,有40個政府物業要修復,包括政府總部、多區政府合署 、警察總部和多間警署,連同其他設施,總維修費約6100萬元,又話當中1530萬元係負責修復立法會損毁設施(玻璃、裝修及裝置)。
立法會話政府負責約2000萬,但建築署就話承擔1530萬,點解兩條數唔同,Emily暫不得而知。
立會買1.5萬個CSI口罩
立法會截至3月26日共花費約169.2萬用於防疫,其中添置體溫量度系統同體溫計,分別用咗20萬同1.16萬;消毒地氈、潔手消毒劑等消毒用品約12.6萬元;外科口罩及N95口罩約7.57萬元。立法會議員毛孟靜關注立法會買咗幾多俗稱「CSI口罩」嘅懲教署生產口罩,立法會透露,今年1月從物流署買咗1.5萬個懲教署生產外科口罩,開支2904元。