【Emily】8分鐘發言 郭偉強鬧人度過 又話要快啲通過增產假條例……
【明報專訊】立法會人力事務委員會噚日開特別會議,開咗兩個幾鐘都係傾規程問題,未入正題講產假增至14周,但會議上火藥味好重,工聯會郭偉強用咗唔少時間向民主黨黃碧雲發炮,話黃讀過書唔等於有涵養,又話「民主黨都係嘥香港人時間」。郭兩次發言大都係攻擊民主派議員,但又話想快啲通過條例。
黃碧雲喺會議開初就要求主席、工聯會何啟明釐清委員會嘅性質同路線圖,何啟明一聽就話,「路線圖?ok,咁王國興嘅?」Emily睇番,前立法會議員王國興以前又真係成日就強積金對冲、全民退保等嘅議題要求政府提供「路線圖」,唔怪得呢3個字令何啟明諗起黨友。
黃碧雲插嘴 郭:讀過書唔等於有涵養
何啟明另一黨友郭偉強,噚日炮火都好激烈,發言時係咁同黃碧雲駁火,其中黃碧雲喺佢發言時插嘴,佢就鬧曾喺理大教書嘅黃碧雲「冇啲禮貌」,「你係咪博士呀,都話讀過書唔等於有涵養啦,我上你堂梗係知你咩Quali啦博士」。
郭偉強愈講愈遠,鬧民主派「食人血饅頭」,畀黃碧雲話佢離題萬丈,但郭偉強繼續用餘下嘅發言時間鬧人,鬧鬧吓,兩次發言,共8分鐘,咁就用晒,而唔係講對增加產假嘅意見。