【Emily】卓悅想幫街坊 搵咗阿尹 尹兆堅康美樓派罩 民記感謝
【明報專訊】青衣長康邨康美樓先後有同坐向住戶確診武漢肺炎,卓悅噚日搵咗民主黨立法會議員尹兆堅幫手,向整座康美樓800幾戶街坊送上1萬個口罩,以及1000包消毒濕紙巾,以解燃眉之急。長康邨當區區議員其實係民建聯梁嘉銘,點解卓悅會搵阿尹?阿尹同Emily講,係有朋友搵佢,話卓悅想幫啲街坊,呢位朋友向卓悅推薦阿尹,話佢有地區網絡可以幫到手,最終促成合作。
當區議員梁嘉銘:不分敵我
卓悅無搵梁嘉銘,但梁嘉銘都有喺社交網站及有同街坊講「有團體」派口罩,引述指趕唔切返去拎嘅單位、團體都會入信箱,更公開「感謝尹議員」、「感謝卓悅」,表明疫症面前不分敵我,呼籲大家齊心抗疫。
尹兆堅同Emily講,朋友前日搵佢,噚日就可以派畀街坊,房署喺非常時期都好幫手,唔需要事前3日申請,就畀阿尹派口罩。佢話多謝卓悅及一眾唔怕疫情、肯落區同佢一齊派口罩嘅伙計;又話搵咗一班康美樓嘅街坊幫手派,形容地區網絡真係好重要。
阿尹話,其實整條長康邨嘅居民都好擔心疫情,但邨內有約8000戶居民,實在難以搵到足夠口罩畀大家。佢強調今次只可以派口罩畀康美樓嘅街坊,或可以防止疫情擴散,「補番個缺口,對整條邨嘅防疫都有幫助」。