【Emily】追問點處理公務員參加暴動、暴力示威、貶低一國兩制 周浩鼎驚訝政府處理咁少公僕

【明報專訊】建制派非常關注公務員有無參與反修例風波中嘅違法活動，輸咗區議會選舉嘅民建聯立法會議員周浩鼎(Holden)喺香港電台英文節目《Letter To Hong Kong》話，曾經問政府點處理有公務員參加暴動、暴力示威，或者公開貶低一國兩制，局方回應話有43個個案，但只有極少數被解僱。

局方回應有43個案 極少數解僱

Holden話非常驚訝，政府竟然只係處理咗咁少個案，而且連炒人數字都無法提供。佢話會繼續要求政府實施有效嘅止暴制亂措施。

Holden又批評泛民唔單止無視示威者嘅暴力行為，仲為示威者開脫、話「責任喺政府同警隊度」。佢話法治係香港嘅基石，但𠵱家就被侵蝕緊，因為有「暴徒」犯法後唔使負責。

話美國唔聽佢哋嘅「堅決反對」

Holden仲話，美國唔聽佢哋「堅決反對」(staunch objection)嘅意見，最終都係簽咗《香港人權與民主法案》，唔單止干預中國內政，呢條法例仲係雙刃劍，長遠會影響香港同美國嘅貿易合作，會影響美國自身嘅經濟利益。