【Emily】為審公僕加薪 阿廷棄赴台觀選
[2019.12.21] 發表
【明報專訊】立法會財委會仲未完成審議公務員加薪撥款，下次開會係下月10號，撞正台灣大選。民主黨立法會議員林卓廷同Emily講，為咗留守香港審議公務員加薪同投票，今次放棄唔去台灣觀戰。
1月11日係台灣總統大選投票日，如果要觀戰，通常都要早一兩日去台灣，睇最後拉票。但今年撞正香港立法會嘅財委會審議公務員加薪，阿廷決定唔去台灣。佢話以前去過好多次觀戰，氣氛好熱鬧，但笑言好多拉票活動都係用閩南話，所以聽唔明。
素人區議員齊赴台
今年有好多新當選嘅素人區議員都會去台灣睇大選，據聞深水埗區議會會喺1月7號開第一次大會，有當區候任區議員同Emily講，有好多區議員同事同日下午要飛台灣睇大選，所以特別約大家朝早9點半開會。
建制派過去亦會去台灣觀戰，但現時兩岸關係緊張，唔知建制派會唔會收到中聯辦溫馨提示，唔希望佢哋去台灣觀選呢。
更多港聞
相關新聞
