【Emily】斥澎湃新聞標題黨 星洲教授促刪文
[2019.08.21] 發表
【明報專訊】內地媒體最近大量發文評論香港局勢，《人民日報》海外版社交媒體公眾號「俠客島」，搵咗新加坡國立大學教授鄭永年做訪問，評論香港局勢；澎湃新聞抽咗其中一小句起題，講中國只要斷香港水就可以解決風波，被鄭永年出聲明大罵，話「標題黨」嚴重侵犯聲譽。
轉載文章改題 轟歪曲原意
《人民日報》嘅標題係〈對話鄭永年：香港風波將如何收尾？〉，澎湃新聞轉載時改咗做〈鄭永年接受人民日報採訪：斷水就可終結香港亂局〉。成篇文章4000幾字，與斷水有關嘅有百幾字。鄭係想講，香港同內地有好多制約，知道分唔開，所以示威者成唔到氣候，講笑話中國只要威脅斷水就得，因為新加坡都係同馬來西亞買水，大馬唔畀水就麻煩；佢都有喺訪問中講明，呢個係一個新加坡前高官朋友嘅說法，「這當然是玩笑說法」。
鄭永年之後出聲明，指澎湃新聞嘅標題嚴重歪曲佢接受《人民日報》採訪嘅原意，「標題黨」嘅做法嚴重侵犯咗佢嘅聲譽，「並嚴重扭曲惡化了陸港兩地民眾的對立情緒，造成了極其惡劣的影響」。另外佢仲點名話內地其他媒體第一時間轉載澎湃嘅報道，「媒體道德墮落本身就是一個悲劇」，要求澎湃新聞等媒體必須刪除文章，並出道歉聲明。Emily噚晚望過澎湃新聞未將篇文落架，但就改咗用人民日報一樣嘅標題。
更多港聞
【Emily】網民常提「金句」 練錦鴻、謝沈智慧、彭家光升區院法官
【明報專訊】司法機構宣布任命3名區域法院法官，包括主任裁判官練錦鴻、常任裁判官謝沈智慧同彭家光，任命由行政長官根據司法人員推薦委員會嘅推薦而... 詳情
【Emily】林鄭話落區 李慧琼同日偕官員行動
【明報專訊】特首林鄭月娥噚日見記者時提到司局長會落區聽意見，民建聯隨即陪同官員落區，其中該黨主席李慧琼（Starry）就同食物及衛生局長陳肇... 詳情相關新聞
