【Emily】場刊印埋會致辭 陳智思缺席動土禮
[2019.07.30] 發表
【明報專訊】剛過去嘅周六同周日(27及28日)，元朗及上環分別發生嚴重警民衝突，不過除咗政府出稿譴責暴力、警方交代行動外，至今未有任何政治任命官員或行政會議成員現身就事件表態。行政會議召集人陳智思噚日獲邀擔任一個動土儀式嘅主禮嘉賓，連場刊都印埋佢會致辭，但大會就話噚日朝早收到通知，陳智思有緊急會議嚟唔到，令一眾記者好失望。
話說舊牛奶公司高級職員宿舍活化計劃噚日搞動土儀式，本已邀曾擔任活化歷史建築諮詢委員會主席嘅陳智思主禮，連現場派發嘅場刊都寫好咗會由佢致辭，但大會話佢有臨時會議嚟唔到。雖然有署理發展局長廖振新、南區區議會主席朱慶虹等擔任主禮嘉賓，最終成個典禮都冇主禮嘉賓致辭。
更多港聞
相關新聞
