【Emily】與元朗遊行搞手握手 Madam落淚：公眾安全要緊
[2019.07.27] 發表
【明報專訊】元朗遊行前夕，公眾集會及遊行上訴委員會噚日裁定元朗遊行申請人嘅上訴失敗，兩個上訴人鍾健平同埋巫堃泰喺聆訊完咗，上前同警方兩個Madam握手，其中元朗分區助理指揮官(行政)曹美英呢個時候突然喊咗出嚟，輕拍佢哋隻手，話「公眾安全好緊要」。Emily走去問Madam點解喊，Madam就笑而不語，真係唔知係因為釋懷，定係擔心今日嘅部署喇。
被問原因笑而不語
元朗呢排氣氛緊張，居民群組不時互傳信息，其中署名「一群愛護元朗的人」話大家都擔憂，希望今日遊行「不破壞、不起螯、不指罵、不暴力」，又話用藤條教仔唔會令爭取民主嘅聲音消失，而示威者堵路、斷水斷電對惡勢力唔會有影響，但係就懲罰咗無辜嘅市民村民，所以唔好咁做。
有元朗鄉紳就話，有鄉民前日喺村界一帶巡過，提醒村民鎖好門窗，留喺村內。十八鄉鄉委會主席程振明噚日就話每日都有傳聞有人扮記者入村影相，「由佢影，一句講晒總之唔好衝擊我哋條村」。
另外，有居民報料話前日有十數村民拎住橫額係元朗大馬路遊行，高喊「白衫不是黑社會」，但規模太細，大家未必留意到。
更多港聞
【明報專訊】各區抗爭遍地開花，示威者為免用八達通留低搭車紀錄，唔少人改用單程票搭港鐵，有人亦會喺購票機放低錢，等其他同路人可以用嚟買車飛。有...
詳情
相關新聞
