助理電郵法案委員 副本寄李家超 阿涂跟足官方格式通知開會
[2019.05.08] 發表
【明報專訊】立法會審議修訂《逃犯條例》嘅法案委員會鬧「雙胞」，建制派通過內會指引，「DQ」民主黨涂謹申主持法案委員會嘅資格，由經民聯石禮謙取代；民主派唔承認指引合法，阿涂前日繼續主持會議，當選埋「主席」，仲定於周六早上開第四次會，同石禮謙決定嘅會議撞期。法案委員會秘書代石禮謙發電郵通知全體委員開會時地，而涂謹申嘅助理亦按立法會官方電郵一貫格式，出文件通知全體委員開會，副本仲要寄埋畀保安局長李家超。
法案委員會秘書馬淑霞幫石禮謙通知班委員，周六朝早9點喺會議室1開會；阿涂前日話未決定喺邊個會議室開會，佢助理噚日以「法案委員會主席議員助理」自居向議員發電郵，同樣預告委員喺會議室1開會，但時間就比石安排嘅早半個鐘、喺8點半開會，完會時間比石安排嘅早半個鐘，又附回條要求委員喺5月9日前回覆係咪出席。換言之，民主派同建制派到時會撞場，相信又會有一番爭持。
民主派承認嘅嗰個法案委員會，已選出阿涂做「主席」，安排嘅議程分別係「確認通過先前會議的紀要」、「與政府當局會晤」同「其他事項」。而石禮謙安排嘅議程就繼續要「選舉主席」。
更多港聞
【明報專訊】《逃犯條例》修訂引起連番爭議，民主派其中一個矛頭指向立法會秘書長陳維安，質疑佢處理議會事宜唔中立。陳維安噚日朝早見傳媒，用中文回...
詳情
【明報專訊】政制及內地事務局長聶德權上年拍片回顧一年工作，片中沿住城門河係咁跑；局長最近接受馬會刊物《駿步人生》訪問時就透露原來佢平時好鍾意...
詳情
相關新聞
