特首濟南寺廟打卡 讚「中華文化精粹」

特首林鄭月娥（中）上載同細仔林約希（左）、大仔林節思（右）喺山東濟南參觀靈巖寺嘅合照。（林太facebook圖片）

【明報專訊】聖誕節唔少政圈中人都會外遊度假，舊年聖誕去咗桂林嘅特首林鄭月娥，今年就選擇去山東濟南市過節。久未放假嘅林太顯得興奮，一連兩日上載同家人打卡合照。林太噚日參觀咗當地嘅靈巖寺同神通寺，形容呢啲古建築都係中華文化嘅精粹，以及歷史嘅見證。

林太上載同大仔林節思、細仔林約希嘅合照，但就唔見老公林兆波，唔知係咪掛住幫老婆同阿仔影相呢？林太話，靈巖寺嘅千佛殿內有40個羅漢像，形容個個形態活潑，更被中國近代思想家梁啟超稱為「天下第一名塑」；神通寺就有刻滿大小佛像嘅千佛崖，同兩個經歷數百年不倒嘅石塔。佢形容呢啲古建築都係中華文化精粹。

另一邊廂，資訊科技界議員莫乃光就去咗日本川越，佢仲大賣廣告，話自己去咗一間賣蛋料理嘅店，食到最滑嘅親子丼，大讚啲滑蛋、滑雞片好甜，又憶述細個唔肯食飯，就叫媽媽加甜餅乾，如果當年有呢碗飯就「掂丼」啦。

周庭去東京放映會 到大學交流

香港眾志周庭去咗日本東京，佢話受到《亂世備忘》日本放映會嘅主辦方邀請，將會參與今晚嘅放映暨DVD發表會，一周後就會參與東京大學交流會，同日本人討論香港人面對嘅危機。周庭話日本同香港看似冇乜交集點，但好多日本人都關心香港、支持香港民主運動，令佢好意外。