【明報專訊】91歲嘅前布政司鍾逸傑近年都好少現身公開場合，但今個月11號(星期日)有一個慈善步行活動，就邀得鍾逸傑做主禮嘉賓。其實呢個活動同鍾逸傑非常有關，醫管局新界西聯網轄下嘅善心醫療基金，當日會舉行「醫社同心慈善行暨嘉年華會」，而鍾逸傑本身就係呢個基金嘅信託委員會主席，所以佢當然要親自到場支持啦。

呢個基金係資助新界西聯網轄下5間醫院嘅慈善醫療項目，幫助屯門及元朗區內有經濟需要嘅病人，鍾逸傑仲為今次慈善行拍咗條短片，片中嘅佢精神唔錯，用廣東話講自己50幾年前已經喺屯門理民府工作，希望大家一齊參加11月11號嘅醫社同心慈善行。Emily聽聞，鍾逸傑當日會負責鳴槍儀式，除咗佢之外，食物及衛生局長陳肇始、醫管局主席梁智仁亦係活動嘅主禮嘉賓。