【明報專訊】兩年前嘅9月4日係立法會換屆選舉投票日，香港眾志羅冠聰勝選，成為最年輕議員，但最終因為宣誓風波被取消議員資格。現年25歲嘅阿聰因為參加大小社運，至今仍未完成嶺南大學學位，佢前晚喺facebook貼文，話前日係投票日兩周年，同時係佢重返校園、喺嶺大復課嘅首個上課日，原因係要完成必修課程，佢感嘆光陰飛逝，「校園沒變，我倒是變得有點衰老」。

今年已經係year 6學生嘅阿聰話，自己過去兩三年，真正留喺學校嘅時間好少，喺年齡上同同班學生亦相差一截，「今年year 2(大學二年級)的學生大多是99年出生，是青春年華的19歲，而本叔已是四捨五入三字頭的25歲了」 ，衰老嘅感覺在於物是人非。不過阿聰話，如果畀佢重新選擇，佢大概都會揀相同嘅路，唔會遺憾，「相比起兩年前，會展台上的我振臂高呼，今日到我在獨室溫習，何嘗不也就是人生歷程的一部分」。