年輕在囚者學做足球裁判 「上半場落敗 下半場盡力」

懲署希望青年在囚者透過足球裁判先修課程同比賽，學習判斷對錯，同時感受社會關懷，加強信心，比賽日佢哋仲獲頒先修班證書。圖為《判定思判》短片片段。（懲教署提供）

【明報專訊】想親身睇亞運足球賽，可以飛去印尼，但喺壁屋懲教所入面搞嘅球賽，就有錢都入唔到場睇喇。懲教署噚日出短片，等大家一睹青少年在囚者早前同香港足總青年軍代表隊對壘嘅精華(youtu.be/FiEs3GdAMdU)，片中12名在囚者唔止踢波，仲輪流擔任球賽裁判。原來壁屋懲教所喺今年中，聯同足總為在囚者舉辦咗足球裁判先修課程，所以比賽時就畀機會佢哋實踐吓。

裁判同旁證都係壁屋青年隊員，Emily留意到，當壁屋隊員犯手球，裁判都好公正判罰12碼，最後壁屋1﹕5輸咗比足總。參加比賽嘅阿勇(化名)感受就好深，佢形容自己被囚只不過係「得咗一面黃牌嘅球員」，同其他人無太大分別，獲釋後仲會以足球裁判做目標𠻹。

波係圓嘅，未到最後都唔知賽果，人生亦一樣，好似片中壁屋隊員阿樂(化名)話齋，「上半場(在囚)可能係落敗，但下半場無論幾艱難，都會盡力令前途更加美好」，Emily祝願佢哋日後人生踢場好波呀。