【明報專訊】政府建議將法定侍產假增至5日，自由黨主席張宇人早前形容「侍產假一日都唔應該有」，反問「以前我哋無侍產假又如何？以前我哋太太無產假又如何？」，惹火言論引嚟唔少批評。該黨榮譽主席田北俊噚日亦「幫理不幫親」，喺facebook向黨友開火：「依家D(啲)年青家庭，生小朋友最多咪一個起、兩個止，成世人都係幾日侍產假啫，使唔使咁呀？」

田少噚日喺fb轉載張宇人言論相關報道兼批評對方，短短5個鐘已吸?逾千個讚好、「心心」同「哈哈」。網民幾乎一面倒撐田少，有網民笑言自由黨「真係好鬼自由」，每個黨員都有唔同理念；有人批評張宇人不知民間疾苦；亦有網民叫田少要當面鬧張宇人，喺網上鬧係無用㗎咁話。

田北俊呢句評論亦成功引起勞工界關注。工黨主席郭永健隨即轉貼田少帖文，形容自由黨「自己黨友都唔撐張宇人」，並喺田少度留言，問佢支唔支持侍產假增至7日。

張宇人早前喺訪問中，話勞工界爭取侍產假係唔會「收手」，舉例爭取完7日就會有14日，批評係「永無止境的苛索」。