小學推廣閱讀 師生齊cosplay
[2018.08.06] 發表
【明報專訊】新學年起，政府會為公營中小學提供津貼，資助學校買圖書，安排推廣閱讀嘅活動。政府新聞網噚日報道，保良局香港道教聯合會圓玄小學早前舉辦咗圖書日，唔單止睇書咁簡單，師生一齊扮演《賣火柴的小女孩》、《威利在哪裏？》嘅角色，增添閱讀趣味。
校長張志鴻話，單純要求學生撰寫閱讀報告未必可取，容許學生自選圖書，然後同人分享，反而有助學生了解故事情節，增進溝通技巧同應對能力。
圓玄小學圖書館目前有上萬本藏書，分散喺校園唔同角落，學生隨手都可翻閱。午膳期間，學生可以一邊食飯，一邊欣賞同學嘅說書廣播環節，認識《西遊記》紅孩兒同鐵扇公主嘅故事。
另外，學校近期買咗百老匯歌劇劇本同演出版權，學生可透過學習戲劇，激發閱讀興趣。
更多港聞
相關新聞
