【明報專訊】香港眾志早幾日舉辦咗一個三日兩夜嘅「眾志夏日營」，有大約20個中學生同大專生參加，眾志成員喺營中分享組織社會運動嘅經驗。眾志秘書長黃之鋒同Emily講，有一個13歲嘅參加者講明有意加入眾志青年團。而眾志明年會再辦夏日營，重點投入青年組織工作。

眾志喺上半年開始轉型，由政黨轉型做民間組織，亦會重點搞好青年工作。今年眾志舉辦第一屆夏日營，主題係「青春不服從」，喺7月30號至8月1號舉行。夏日營透過競賽遊戲、電影同音樂，向參加者分享策劃社會行動嘅經驗、分享投身民主運動經歷等，主席林朗彥、黃之鋒、常委羅冠聰同鄭家朗等都有出席。

羅冠聰喺facebook話，用呢個主題係希望話畀大家知「脫隊(離開主流)不可怕」，每個人都有長處，以及可以為社會帶來貢獻嘅特殊位置。阿聰話希望可以傳承自己嘅想法同經驗，強調年輕力量係民主運動嘅重要泉源。只得25歲嘅阿聰亦慨嘆自己已經老喇，當成班參加者喺凌晨1點仲可以精神飽滿咁玩，佢就已經累透。