投籃鬥眼力 祥哥勝陳恒鑌

民建聯梁志祥（左）同陳恒鑌（右）噚日戴上眼罩射玩具籃球鬥眼力，兩人同樣入咗兩球，但祥哥憑住射中難入啲嘅高分籃框贏出。（梁智康攝）

【明報專訊】民建聯噚日舉行傳媒茶敘，宣布推展「社區健康計劃」，同醫療公司合作，喺全港18區個別學校同社區中心等，分批提供免費驗眼、驗耳同驗骨質服務，並舉辦保健講座，畀公眾參與，希望提高市民注意身體健康嘅意識。

18區免費驗眼驗耳驗骨

為咗體驗眼疾者嘅生活，立法會議員梁志祥同陳恒鑌(Ben)噚日戴上模仿黃斑病變同青光眼嘅眼罩，投射玩具籃球鬥高分，結果年紀大一截嘅祥哥贏咗阿Ben，眼力相當唔錯。

戴眼罩射籃 體驗眼疾者生活

本身戴眼鏡嘅阿Ben擔任計劃嘅護眼大使，佢笑言行出街有六成人都戴眼鏡，自己做護眼大使更有代表性，佢又大談護眼錦囊，包括用電腦或手機時要間中休息。祥哥就建議政府多做護眼宣傳，同擴闊長者醫療券適用範圍，例如涵蓋購買助聽器，政府長遠亦應該為市民每年提供一次體檢服務，但現時醫療人手有限，短期內可先為長者同幼童檢查視力同聽力。