【明報專訊】立法會噚日舉行午間音樂會，青年音樂訓練基金用中西樂器合奏，而建制派同泛民議員就暫時放低平時議事堂嘅爭拗，合作演出。經民聯盧偉國、公民黨陳淑莊、新民主同盟范國威同立法會秘書長陳維安合唱《萬水千山縱橫》，醫學界陳沛然、教育界葉建源打鼓伴奏，盧偉國仲主動同范國威握手𠻹。

梁君彥：平時議事廳都無咁多議員

有份大合唱Auld Lang Syne(《友誼萬歲》)嘅立法會主席梁君彥，喺唱完歌之後笑住話，未試過咁多議員嚟聽音樂會，平時喺立法會議事廳都冇咁多人，之後話鋒一轉，話好認同議員都係為香港人做事，中西樂玩嘅樂器唔同，好似唔啱Key咁，但終歸係可以夾到，希望議員可以放低今年爭拗，下年合作好一啲。

今次活動，有前高官蕭炯柱?支持，佢以青年音樂訓練基金主席身分參加，話班學生緊張咗兩星期，佢希望教學生挺起胸膛面對觀眾。梁君彥就話，啲議員可能緊張咗兩個月，所以「年輕人做嘢千祈唔好話驚，可能人哋仲驚過你」。有參與演出嘅學生話，感謝議員特登為音樂會入天水圍同佢哋綵排，佢哋相信議員都係為香港好，想市民開開心心、安居樂業，希望議員唔好忘記初心。