【明報專訊】立法會內會噚日否決支持實政圓桌田北辰喺大會提出，引用《立法會(權力及特權)條例》授權交通事務委員會，查港鐵沙中線會展站同土瓜灣站嘅工程問題。最終投反對票嘅民建聯蔣麗芸(Ann姐)，喺投票前就舉手申報：「我屋企有親戚喺中建(中國建築)做獨立非執行董事，我唔知係同呢個工程有無關係」。

內會主席李慧琼就同Ann姐講，「我哋(議員)要按議事規則申報嘅係個人作為議員，(就事件)有無直接或間接金錢利益」。Ann姐即刻大呼話自己無港鐵股票、無直接利益。

毋須申報 話唔使講得咁仔細

Ann姐會後同Emily講，佢口中嘅親戚其實係佢丈夫梁海明。佢解釋，投票前黨友陳克勤話見到有報道講梁海明擔任獨立非執董嘅「中國建築國際集團」，同禮頓聯營承辦沙中線會展站工程，另一黨友周浩鼎就提議佢申報埋。至於點解唔直接話係丈夫，而係話親戚呢？Ann姐解釋，其實唔需要申報埋佢老公嘅事，所以都唔需要講得咁仔細。

財政司長陳茂波任發展局長期間，曾被揭發家人持有新界東北古洞地皮，佢形容持有地皮嗰間公司「係太太及其家人」嘅，令人誤會係外家親戚，事後被發現「其家人」原來係佢個仔陳天行。