【明報專訊】香港各界慶典委員會近年租用維園足球場舉辦慶回歸活動，引來民陣不滿，而主席鄭耀棠前日亦指往後會考慮繼續租借維園足球場搞慶回歸活動。近日不時化身「鍵盤戰士」評論時政嘅前特首梁振英(CY)，就同棠哥「唱反調」，CY喺facebook呼籲愛國團體喺明年七一，「把維園讓給民陣吧」。 民陣﹕有咩資格講 CY唔係為民陣發聲，其實佢係揶揄七一遊行人數少，質疑民陣唔理警方反對，堅持要喺東角道出發，仲叫市民中途加入，係「心中有數，知道人數少」。CY話，如果民陣喺維園集合出發，「『篤數』和『呃秤』就會和六四晚會一樣太難看。因此明年七一，愛國團體就乾脆把維園讓給民陣吧」。 民陣副召集人、立法會議員區諾軒話，慶委會個活動門可羅雀，反駁CY「有咩資格話(民陣)人少？」除咗遊行，團體亦趁機籌款，民陣噚日公布當日大會籌得約20.3萬元。香港眾志、社民連及「小麗民主教室」分別籌得53萬、46.3萬同27.6萬元，成為「吸金三甲」，表明積極考慮參戰立法會九龍西補選嘅劉小麗話非常感謝市民支持。 民主黨公民黨籌款減 至於其他政黨嘅籌款數字普遍就比去年下跌，民主黨今年籌到12萬元，比去年減少5萬元；公民黨籌到22.3萬元，比去年少咗大約3.7萬元；工黨籌到8.5萬元，較去年下跌4.3萬元。
|
| |
| |
;){kind=small}
