【明報專訊】立法會主席梁君彥限時36個鐘辯論高鐵一地兩檢條例草案，預喺噚日完成表決，有講法係因為佢要就兩個經民聯黨友，包括梁美芬同劉業強離港出席仔女嘅畢業禮，想佢哋可以投到票。泛民噚日喺會上都有質疑梁君彥咁趕完成審議，係咪因為咁。梁美芬就話要呼冤，話指控無中生有，同事實不符，因為主席決定限時前並無同黨友商量，而佢事前都無同過梁君彥講自己會到美國出席個仔嘅畢業禮。佢仲話為咗一地兩檢投票，已買咗兩張機票，睇時間走盞。

梁美芬話，擔心噚晚個會開得夜，所以買咗兩張機票，一張係15號(今日)凌晨，一張係15號嘅中午，仲要預咗喺20號清晨5點返到香港，因為擔心萬一下星期先投票，佢都可以趕到返嚟立法會。正所謂有圖有真相，梁美芬拎咗兩張單據畀Emily睇，證明真係有兩張機票在手，仲話取消其中一張機票都要幾千蚊，話呢啲無中生有對梁君彥同佢都唔公道。

昔日有「等埋發叔」投票，今次一地兩檢唔通又要「等埋發仔」？劉業強就澄清唔係噚日離港，而係嚟緊周末為咗公事先要離港。佢笑住話「我嗰票唔係咁重要」，仲話黨友梁君彥係公平公正咁決定會議時間。