權威期刊精選 3教授領軍 全球矚目醫學論文 中大10佔2
[2017.12.27] 發表
【明報專訊】全球頂尖醫學期刊《新英倫醫學雜誌》喺今年內獲該雜誌刊登嘅論文中，揀咗10篇對全球醫療及病人護理方面最具意義嘅研究文章做「年度矚目論文」，結果再有港人之光，其中兩篇係由中文大學醫學院3名教授莫樹錦、盧煜明、陳君賜分別領軍，中大更加係唯一上榜嘅亞洲學府𠻹。
亞洲唯一上榜學府
中大腫瘤學系主任莫樹錦領導嘅有關肺癌基因突變研究，證實帶有表皮生長因子受體(EGFR)基因變異嘅肺腺癌患者，如接受一線標靶治療後再出現基因突變同抗藥性，可透過新嘅治療模式，將癌症無惡化存活期有效延長超過一倍。
至於中大化學病理學系教授陳君賜聯同中大化學病理學系系主任盧煜明領導嘅研究，就為超過2萬人檢測，證實透過分析血漿內EB病毒(Epstein-Barr virus)DNA，可以喺病人未有病徵前，就有效地及早診斷出鼻咽癌。
「5%中的5%」
能夠獲呢份歷史最悠久嘅醫學期刊選中做「年度矚目論文」，真係唔簡單，佢哋每年平均收到5000份研究論文，只會刊登當中5%最優秀嘅文章，再喺呢5%入面揀10篇「年度矚目論文」，可想而知3名教授有幾勁。
更多港聞
相關新聞
