慢必開會阿廸食麵 Miss Mo獨守空枱 泛民4人結盟 頭炮記招「流會」
[2017.11.17] 發表
【明報專訊】立法會內民主派4個「單頭議員」，包括香港本土毛孟靜(Miss Mo)、自決派朱凱廸(阿廸)、街工梁耀忠，以及人民力量陳志全(慢必)，噚日宣布合組聯盟「議會陣線」，由Miss Mo任召集人，話成立陣線係為咗令民主派第四板塊可以更有效溝通同合作。不過，聯盟出師不利，話說慢必噚日因為要留守議事廳、朱凱廸去咗食麵，令記者會遲遲無法開始，最終仲要「流會」。
成立記招原定下午3點開始，大批記者當然到場採訪，但一直未有議員現身，毛孟靜遲咗幾分鐘先出現，佢一入場已經道歉話要大家等，點知等多10幾分鐘其他人都未到，Miss Mo就「安撫」記者，話昔日自己做記者時，成日都要等人。
不過，等咗接近20分鐘，都只有梁耀忠出現，Miss Mo就開始用電話求救，叫大家快啲嚟，原來朱凱廸去咗食麵，慢必又要留守議事廳動議中止待續議案。最終大家等咗半個鐘都未齊人，記者會只可以無奈取消。4人改為喺議事廳外嘅「咪兜」見記者。
幾經辛苦，終於集齊4個「單頭議員」，佢哋見記者時首先高呼「團結抗威權、齊心頂硬上」，之後再介紹成立目的，慢必話成立聯盟令進步民主派團結，唔會孤軍作戰；Miss Mo就強調佢哋係聯盟唔係政黨，唔會用陣線名義參選，喺立法會投票時亦唔會綑綁。
更多港聞
相關新聞
