【明報專訊】立法會交通事務委員會噚日視察沙中線工地，啟德站同土瓜灣站內櫳亦首次曝光，其中啟德站以橙黃色做主色調，有3個出口，分別通往啟晴邨、啟德行動基地以及啟德1號。Emily都有去，見啟德站內設施已經基本建成，但出現疑似「蝦碌」事件，原本A、B出口喺大堂嘅同一邊，D出口喺另一邊，但大堂指示牌就寫咗B同D出口喺同一邊。港鐵職員解釋，大堂仲裝修緊，指示牌未能作準。

重置宋元古井 土瓜灣站內抬頭可見

至於早前因為發現宋元時期古蹟而令工程延誤11個月嘅土瓜灣站，港鐵話已經基本追回進度，並預留咗一幅四方形位置原址重置「J2」古井，古井會向下延伸至土瓜灣站大堂嘅天花板，港鐵日後會將嗰個區域嘅天花板換成透明板，市民可以喺站內抬頭見到古井。Emily問過港鐵，佢哋話重置時間表同方法等，都要等政府決定。

沙中線有10個站。港鐵工程總監黃唯銘話，截至今年9月，大圍至紅磡站段工程已完成92%，路軌已完成鋪設，4個車站已完成結構工程，土瓜灣站亦即將平頂，全線進入機電設備安裝階段，按計劃2019年中通車應該無問題。至於個工程超支幾多，佢話今年內會交代最新造價預算。立法會鐵路事宜小組委員會主席田北辰估計，沙中線將超支最少100億元。