官員請記者食嘢 變每周例行公事
[2017.11.11] 發表
【明報專訊】特首林鄭月娥一直強調要有管治新風格，要官員多啲同立法會議員溝通，改善行政立法關係。立法會復會以來，每個星期嘅大會都會有唔同官員準備食物畀議員享用，包括蛋糕、燒肉等，連記者都有份。
蘿蔔糕椰撻有寓意
噚日係立法會辯論施政報告致謝議案嘅最後一日，政務司長張建宗就特別吩咐官邸嘅廚師，整咗幾盤蘿蔔糕、椰撻同豬頸肉，由山頂運去立法會畀議員同記者食，由佢嘅政治助理蕭嘉怡分發。
蕭嘉怡話，請記者食蘿蔔糕同椰撻都係有寓意，分別係祝大家步步高陞同甜甜蜜蜜，又話大家工作咁長時間都好辛苦。有記者問蕭嘉怡有無幫手整，佢笑住話自己整嘢食唔叻。
今次已經唔係張建宗第一次請記者食嘢，記得上個立法年度最後一次大會，張建宗就親手捧住盒蛋撻慰勞記者。
更多港聞
相關新聞
