【明報專訊】港鐵上個禮拜一喺官方手機程式(App)加咗「快捷出站」及「站內搜尋」兩個功能，但就畀提供類似功能嘅手機程式Pokeguide指控抄襲，話港鐵之前同佢哋傾過幾次，之後一聲都無通知就推出「一模一樣」嘅功能，勁鬧港鐵作為一間大企業，喺無通知下將概念據為己用。事件引起網民熱議，有人狂tag港鐵要求解釋，但亦都有人話抄概念呢啲嘢好模糊，建議Pokeguide下次申請咗專利先。

港鐵就喺社交網站專頁「解畫」，話早喺2013年已經留意到紐約有手機應用程式，為乘客提供快捷出口資訊，2015年曾收到新增站內導航嘅建議，轄下德福廣場當時已經用緊，經研究後決定用喺金鐘站入面。港鐵就唔認自己係抄襲，但就話會聯絡對方，加強溝通。

Pokeguide係2015年成立嘅初創企業，先後拎咗青年協會STEP培育計劃，同科技園網動科技創業培育計劃等資助，去年仲贏咗「最佳智慧香港(公共資料應用)」金獎。Emily搵Pokeguide負責人，但佢就咁啱離港公幹，暫未能回應。