【明報專訊】十幾名社運人士因為政總東翼前地案、反新界東北示威案，早前被法庭判監，Emily知道陸續有立法會議員去探佢哋。社福界議員邵家臻發起《繼續探訪13+3行動，不可讓政治犯孤單》行動，佢噚日去咗赤柱東頭懲教所探望新界東北案嘅被告郭耀昌及黃根源。 邵家臻話，郭耀昌反映監獄內炎熱難耐，由於佢係新人，暫時負責洗廁所等雜務，而獄內生活好悶，都希望多啲人探，可以傾偈，好彩同囚友相處尚算融洽。邵家臻同佢講咗早前嘅「支持政治犯」遊行，郭耀昌覺得好鼓舞，寄語港人要自強自救。 另一立法會議員黃碧雲就同助理去咗赤柱監獄探社民連成員黃浩銘。佢引述阿銘話，囚友同懲教職員態度友善，日頭主要喺車衣工房工作，摺衫、清潔廁所都要做；不過每日12小時困喺監倉內，通風設備不足，好熱同焗，身體適應有困難，盼長遠可改善整個監獄嘅通風系統和設備。 黃碧雲話，阿銘希望大家寫信畀佢，交流吓對近期政局嘅睇法，都同佢打吓氣咁話。
|
| |
| |
