【明報專訊】香港大學專業進修學院(SPACE)嘅前身——港大校外課程部，原來已成立60周年，SPACE隆重其事，專登將一班傑出校友修讀課程嘅故事輯錄成書出版，其中做過校友又做過課程導師嘅就係天文台前台長林超英。林超英係SPACE常客，修讀課程多元化，由觀鳥到外語，以至社交舞蹈都有，確係持續進修嘅樣辦個案。佢同Emily講笑咁話，曾經認真諗過幾時先停止學習，結論係﹕「應該係死前10秒鐘，否則會好悶㗎！」

港大校外課程部喺1957年成立，SPACE榮休院長楊健明就話，佢哋係東南亞第一個大學校外課程部，第一年學生有330人，而歷年已經有260萬人次修讀過佢哋啲課程。楊健明仲講威水史，話上世紀50年代率先開辦法律課程，去到60年代成個法律課程部門搬去港大本部開辦。

SPACE出版慶祝60歲嘅新書《活學空間60載—HKU SPACE校友的見證》就記錄唔少校友訪談故事，包括林超英。林超英就話，多年來除咗幫襯SPACE，仲有修讀其他院校課程，亦搵過導師私人教授畫畫等。林超英話唔進修會好悶，笑住話自己潮州人，自小講潮州話、廣東話、普通話，之後學英文，30歲去讀日文，40歲學法文，57歲仲走去SPACE學西班牙文，之前又學過啲德文，故都算識用8種語言。佢話學西班牙文時係全班最大年紀學生，而且筆試成績全班最好！

原來SPACE有一個政界知名校友曾鈺成，據說曾鈺成早喺讀中學時嫌自己數學科成績唔夠好，去咗港大校外課程部報讀數學課程！曾鈺成其後都有幫襯SPACE進修外語同法律課程，仲有喺SPACE做過導師教數學。