【明報專訊】政府噚日公布3名高層官員調動。懲教署長邱子昭將於本月20日退休，由副懲教署長林國良(圖)出任懲教署長，接替將展開退休前休假嘅邱子昭。

林sir加入懲教署超過30年，喺1980年任職懲教主任，2011年升至副署長。傳媒接連報道少年犯疑喺獄中被虐事件，引起公眾關注，Emily問過跟進少年犯事宜嘅立法會議員邵家臻對新任署長有咩期望，邵家臻話對即將退休嘅邱子昭好失望，因為過去幾個月，都未有官方懲教人員接觸佢哋回應事件，佢期望林國良可以改革制度，正視虐囚問題，例如委託獨立人士重新審視少年犯喺獄中嘅情况。

政府同時公布另外兩個高層官員調動。通訊事務總監利敏貞下星期五接替即將退休前休假嘅何淑兒，出任商務及經濟發展局常任秘書長(通訊及創意產業)，而運輸及房屋局副秘書長(房屋)/房屋署副署長(策略)王天予就會喺下星期二接任通訊事務總監。