月亮太光猛 阻睇周六流星雨
[2017.08.08] 發表
【明報專訊】本周六(12日)有一年一度嘅英仙座流星雨，到時每個鐘最多會有逾百粒流星劃破長空，大家記住趁機會許個願！不過唔好咁大期望住，事關Emily問過香港太空館二級助理館長陳俊霖，佢話由於今年咁啱個月亮升上地線好光猛，令見到流星嘅機會大打折扣。佢粗略估計，假設周六天氣好，每個鐘可能見到10粒流星。
「10粒已經好好啦，我早兩日去酒泉沙漠睇星，天氣好好，但因為有月光，只能一個鐘睇到4粒(流星)。」根據天文台嘅9天天氣預測，周六大致天晴，早上局部地區有驟雨。
陳俊霖話，理論上所謂每個鐘見到150粒流星係好完美嘅情况，要個天好乾淨、地點好似沙漠或草原咁空曠、冇光害，仲要流星喺頭頂好似花灑咁灑落嚟，先會見到咁狀觀嘅場面。
雖然今次觀測條件唔太好，但陳俊霖都有睇流星雨嘅心水推介地方，市民如果想睇，可以去西貢萬宜水庫嘅東壩或者天文公園、北潭涌、清水灣郊野公園入面嘅大坳門風箏場、大美督，或者石澳泳灘再走一段路入去大頭洲；又或者留番今年年尾都仲有一次雙子座流星雨，佢估計會好睇啲，「香港嘅地理因素影響，睇雙子座(流星雨)會(較英仙座)好啲」。
更多港聞
【明報專訊】全港第一間獨立通訊社FactWire傳真社噚日發起「公眾訂閱計劃」，希望市民以每日7元，即一年共2555蚊訂閱傳真社嘅調查報道，...
詳情
相關新聞
