【明報專訊】民建聯噚日公布新一輪「消費者信心指數」調查結果，今年錄得自2008年3月以來嘅最高水平，當中3項指數都回升，民建聯話，結果反映近期經濟同就業都好過以前喎。 民建聯喺6月中至7月頭以電話訪問咗566人，綜合消費者情緒指數由上次(今年1月)嘅69升至82；消費者預期指數由上次70升到86.7；而目前狀况指數就由上次67.5回升到75。另外，有19.7%受訪市民話過去一年個人財政狀况「好轉」，較上次多4.2個百分點；不過，表示「轉差」嘅市民都較上次多1.2個百分點，達47.1%。 至於對個人未來一年財政狀况展望就較之前樂觀，表示「轉差」嘅由上次調查約40%減至34.5%，表示「轉好」嘅人就由上次11%增加至18%，係自2008年3月以來最高水平；對香港1年同5年經濟前景期望持正面嘅受訪市民都較上次多，負面嘅就由上次51%減到36%。
|
| |
| |
