【明報專訊】民建聯立法會議員周浩鼎(Holden)早前建議喺立法會搞7人欖球隊，希望可以「跨黨派合作」，用運動修補撕裂，可惜Holden呢個良好意願暫時凍過水。立法會秘書處之前就增加立法會運動隊諮詢議員，雖然有21個議員支持成立非撞式7人欖球隊，但話會入隊嘅只有6個人，所以最終都搞唔成。
有唔少泛民主派議員之前都有和應Holden嘅建議，包括公民黨譚文豪同剛剛被DQ嘅香港眾志羅冠聰，佢哋曾經話有興趣加入。𠵱家差一個人先可以組隊，唔知係咪因為無咗羅冠聰呢？
另外，立法會秘書處話收到議員就議員活動室設施提出嘅意見，決定移走活動室嘅視像體育遊戲，但會增設now TV服務同一部划艇機。
