【明報專訊】民協前主席莫嘉嫻因為唔認同馮檢基會代表民協參加九龍西立法會補選，宣布退黨。莫嘉嫻話，暫時未決定日後嘅方向，但指民主黨有聯絡佢，「我要諮詢家人我係咪適合繼續從政」。佢強調「唔會參加補選，無咩興趣」。 未定去向 民主黨有聯絡 嘉嫻話，市民喺近年嘅選舉中已經透過選票反映意願，希望由新人參選，但馮檢基仍然堅持覺得立法會補選要搵有知名度嘅人參選，「好似仲未醒……我覺得(馮檢基)唔會贏到，因為市民嘅心態已經改變，有知名度嘅人被唾棄」。嘉嫻強調今次唔係針對個人，「我同阿基唔係世仇或者反面，只係不能接納佢參選嘅決定」。 阿基：有啲唔開心 莫嘉嫻1996年開始喺民協工作，1999年首次代表民協參加九龍城區議會選舉並一擊即中，自此連續4屆區議會都贏。惟喺2015年嘅區議會選舉中，莫以45票之差敗於民建聯嘅24歲新人邵天虹。嘉嫻噚日同Emily講「我將青春、努力都放喺民協，𠵱家有啲無奈，要畫上句號」。 對於莫嘉嫻退出民協，馮檢基同Emily講覺得好可惜，指嘉嫻服務民協18年，對該黨有貢獻。阿基話最近幾個星期都有致電或WhatsApp嘉嫻，希望同佢坐低討論退黨問題，「但佢無回覆我……我覺得有啲唔開心」。 阿基強調，佢係通過民協內部嘅民主初選機制，並重申會參加泛民初選。阿基話九西補選唔係民協嘅「家事」，而係整個民主派嘅「公事」，指泛民需要一個最大勝算嘅人，去對抗建制派。
|
| |
| |
;){kind=small}
