【明報專訊】今年係經民聯成立5周年，佢哋將會播「紅戲」《建軍大業》賀黨慶。經民聯主席盧偉國話，將會舉辦電影《建軍大業》首映贊助活動，宣傳聯盟，又話《建軍大業》係「建國三部曲」系列嘅第三部電影，市民可以透過電影更了解解放軍嘅歷史。 《建軍大業》係慶祝解放軍建軍90周年嘅電影鉅製，將會喺8月上映。盧偉國話好多謝寰亞電影呈獻《建軍大業》嘅首映活動，話到時會邀請社會各界友好贊助，扣除必要開支後，就會將收益撥作黨務發展用途。經民聯監事會主席林建岳就係寰亞電影老闆，計Emily話，今次真係要多謝黨友啦。 《建軍大業》以1927年共產黨針對國民黨發起嘅南昌起義為背景，由香港導劉偉強執導，內地演員劉燁飾演年輕毛澤東，霍建華扮演蔣介石。 經民聯另外出版咗《香港回歸20年成就一覽》小冊子，作為慶回歸活動之一。小冊子分享香港回歸20年來喺經濟、民生、基建規劃、勞工、「一國兩制」同政制發展等方面嘅成就。
|
| |
| |
