【明報專訊】政府即將換屆，政界近期籌備唔少送別或迎新活動，立法會噚日就致函議員，話主席梁君彥將於7月10日(周一)設午宴，宴請新任特首林鄭月娥及新班子官員。今次活動可以被視為改善行政立法關係嘅舉措，Emily就問民主派政黨領袖，普遍都無一口說不，有人話願意考慮，有人仲話會參加𠻹。 民主派對待林鄭月娥與現任特首梁振英(CY)嘅態度，可謂幾唔同。其實立法會聽日(16日)為CY舉辦嘅餞別午宴，一早問大家去唔去，泛民就集體杯葛，相信CY屆時只會同建制派議員、行會成員「同枱食飯」。 郭榮鏗擬參加：林太唔同CY 梁君彥宴請林太及新班子，設大合照、餐前酒會及午膳環節。身兼公民黨及專業議政身分嘅郭榮鏗話計劃參加，講明林太同CY唔同，佢哋無興趣同CY食飯。公民黨黨魁楊岳橋就話會考慮係咪參加，唔會即時說不，但要等黨友一齊討論吓先決定。 街工梁耀忠就話去唔去食飯「未作決定」。民主黨主席胡志偉同Emily講，噚日先知有呢項宴請，等今晚黨中委開會傾吓先啦，反正唔使趕住回覆。佢話同林太關係係點，真係先要睇吓林太點樣處理社會撕裂問題，睇吓佢官員班底有乜嘢人，同點樣處理行政立法關係事務，例如點樣應對財委會議程積壓問題。
|
| |
| |
