【明報專訊】近期積極推動搵流浪貓捉老鼠嘅民建聯議員蔣麗芸(Ann姐)，噚日再有新搞作，佢喺facebook出帖文，話立法會工作人員每次為議員添水都會添滿，但好多時飲唔晒，好浪費，所以佢特登去信立法會行管會，建議每次限添半杯水，而行管會亦「從善如流」，回覆話會提醒工作人員添水時嘅分量，避免浪費。 Ann姐話「勿浪費食水，由議員做起」，形容大家都話要珍惜食水，但有啲議員其實係「大嘥鬼」，不過就無點名。Ann姐隨文貼出海報，圖中用手指指住大家，叫議員「只准飲半杯水」，配上環境局好受歡迎嘅「大嘥鬼」公仔。 有網民支持Ann姐做法，但有人批評Ann姐口講珍惜食水，但對東江水「超買」唔出聲，有網民更不留情面，叫Ann姐喺議會少啲發言，咁就唔使飲咁多水喎。 海報動作似足卿姐籲熄燈 Ann姐致力推動環保，令人諗起民主黨前主席劉慧卿幾年前都曾以類似設計嘅海報，提醒同事離開會議室前要熄燈熄冷氣，唔知Ann姐喺環保議題上有無興趣同卿姐攜手合作呢？
|
| |
| |
;){kind=small}
;){kind=small}
