助弱勢 感嘆由被讚到被罵 張超雄榮休前授「公義課」
[2017.04.18] 發表
【明報專訊】年屆60歲嘅工黨立法會議員張超雄，月前喺理大應用社會科學系講師崗位上退休，張超雄一班舊生同現屆學生，噚日喺理大幫佢舉辦咗一場「榮休分享會」，幾十個曾經受佢指導、幫助或同佢共事嘅出席者分享相處回憶，有人讚張超雄堅持理念、「斯文勇武」，亦有人話佢肯畀心機聽意見，真誠信任弱勢社群。
分享會出席者讚「斯文勇武」
張超雄噚日喺facebook直播呢場分享會，曾經喺美國生活嘅佢，慨嘆喺美國同香港兩個世界生活過，華人喺美國係身處弱勢嘅新移民、少數族裔，自己喺彼方幫助佢哋時，對方「不知幾高興」；但當自己今日喺香港幫助新移民，卻被同一班人「指住嚟鬧」。
張超雄又為出席者上一堂「公義」課，佢話自己心目中嘅社會公義，係社會上人與人之間嘅差異唔好太大，當社會有能力同資源改善所有人生活，就應該令各人嘅生活環境大致一致。
佢話，幫助弱勢時要做到平衡，意思係聽到一啲投訴或訴求時，唔應該只聽一面之詞，而係聽幾方面聲音，例如有人投訴有學校存在不當情况，自己會聽埋學校聲音同政府解釋，再決定點處理。
更多港聞
青年「爆橋」拍片推廣惜食 城大生作品獲選「最強團隊」
【明報專訊】每日廚餘重量等於240架巴士 香港每日產生超過3000噸廚餘，重量約相等於240架雙層巴士，數量都幾嚇人。為咗推廣「惜食」... 詳情相關新聞
